أضرب و اجري
الفرح
لم أشاهد فيلم (الفرح) حتى الآن و ربما سبب تكاسلي هو خوفي من أن يكون نسخة مكررة من فيلم ( كباريه) اعتمادا على نجاح الأخير بنفس طاقم العمل تقريبا, أما لو نجح الفيلم و كان مختلفا فلا مانع لدي فيما بعد من مشاهدة أفلام ( عيد الميلاد ) ثم (الطهور) على التوالي , و كل سنة و انتوا طيبيين و ربنا يزيد الليالي الملاح. مجلة عشاق الفن 1-7-2009
المرجيحة يا هيفا
أجادت (هيفاء وهبي) بحق في دورها في فيلم (دكان شحاتة) و إن كنت غير قادر على تحديد هل قدمت ما لم يكن باستطاعة أي ممثلة أخرى مصرية أن تقدمه – باستثناء- مشهد المرجيحة الذي أعجزت فيه لدرجة تجعلني أنضم لمجموعة الدراويش أمام المرجيحة مطالبا (هيفاء) ببطولة فيلم (المرجيحة) مجلة عشاق الفن 1-8-2009
-------------------------------------------------------------------------------------------------------
حصريا
مع كل رمضان و لما بينصبوا سوق المسلسلات,بأشوف كلمة (حصريا)على إعلان نفس المسلسل في أكتر من قناة, إتلخبطت جدا لأني على قد فهمي كنت فاكر (حصريا) دى معناها إنه حكر على قناة واحدة,و لما سألت أحد العالمين ببواطن الأمور الرمضانية أفاد بعد ان فطس على روحه ضحكا من سذاجة صاحبكم أن (حصريا)هنا تعني أنك (محاصر) بالمسلسل من جميع القنوات و العلم عند الله. مجلة بحلقة 21-8-2009
-----------------------------------------------------------------------------------------------------
بجد ؟يا راجل....
جميل جدا اننا في رمضان بنتحول اللى ما يشبه الملائكة فلا كذب و لا مخدرات و لا شتايم من إياها حتى الأدراج المفتوحة في المصالح تغلق موسميا في رمضان,و لكن الموضوع له زاوية مخجلة و هي إن في تصرفاتنا دي إعتراف ضمني مننا إننا عايشين باقي السنة شياطين من ماركة (إبليس). مجلة بحلقة 21-8-2009
-------------------------------------------------------------------------------------------------------
فطرونا بقى
مصادفة كويسة إن منتخبنا هايلعب مباراة ( رواندا) في رمضان شهر إنتصارات( بدر) و( أكتوبر) و خصوصا إننا متأكدين إن كل المنتخب هيلعب و هو صايم بس ياريت يلعبوا للفوز و ما يخلوناش إحنا نفطر ... كما نتمني إنهم لا يتعللوا بعد الهزيمة –لا قدر الله- بإنهم- كانوا بيحاولوا يكفروا سيئاتنا مضاعفة في رمضان و نحب نطمنهم إن من سنة 90 و خلال مشوار العذاب الدوري لوهم المونديال تمكنوا من تكفير سيئاتنا و سيئات اللى خلفونا تماما و لله الحمد. مجلة بحلقة 21-8-2009
---------------------------------------------------------------------------------------------------
كنافة بالقشطة و الريس
صديقي قاللى في لحظة تجلي قبل السحور (أنا نفسي أبقي رئيس جمهورية ) و تقريبا عدل المخدة اللى نايم عليها و بعدين سألني ( يا ترى من حقي أحلم ) و حيث إني كنت متجلي أنا الأخر مع حتة كنافة بالقشطة قلتله (أحلم من حقك طبعا ) و بعين وقفت في زوري حتة قشطة و انا بأساله في ذعر ( بس المهم هاتخلف ولد ؟؟؟؟ ولاهاتخلى النسوان تحكمنا على أخر الزمن ؟)....هي الكنافة دي من عند مين ؟ مجلة بحلقة 27-8-2009
-------------------------------------------------------------------------------------------------------
حكومة رشيدة
لما عرضوا مسلسل (العندليب ) و مسلسل ( السندريلا ) لقيت كل من سعاد حسنى و عبد الحليم كل واحد عانى في حياته جدا ....و بعدين السنة دى شاهدنا (إسماعيل يس ) و (ليلى مراد ) فوجدنا نفس المعاناة و هو ما يؤكد فكرة أن الإبداع يولد من رحم المعاناة ....و الموضوع ابهجني جدا الصراحة ...تخيلوا فى المستقبل 80 مليون مبدع مصري شاربين المر من كيعانهم والله ...و قال بيقولوا الحكومة مش فاهمة بتعمل إيه . مجلة بحلقة 27-8-2009
اوسة
(محمد عبد المنصف) احسن حارس مرمى فى مصر و يمكن فى العالم كله ...أيوة .....الموضوع مش تحيز ولا حاجة لكن اللاعب لسة بيقف في مرماه يبث الرعب في قلوب زملاؤه و الطمائنينة في قلوب المنافسين رغم إن أي حارس تاني عمل اللى عمله (أوسة) أكيد كان هايصاب بعقدة نفسية و يعتزل اللعب تماما .....العب يا منصف مجلة بحلقة 27-8-2009
أي بطولة
يوم السبت هايلعب منتخبنا من أجل الوصول الى كأس العالم ...يا ريت نفوز لو ناويين نوصل ،اما لو النية مش موجودة من أولها يبقى يا ريت نخسر عشان نلحق اللى فاضل من الدورة الرمضانية ، و أهي كلها بطولات. مجلة بحلقة 4-9-2009
-------------------------------------------------------------------------------------------------------
ممكن دقيقة ؟
بعد المسلسل الرمضاني من شركات المحمول و اللى كان موجه للأساتذة ( سيبني في حالي الدنيا صيام ) و (صحينى عالمدفع ) و اللي خدعوا بيها المواطنين بفكرة أن الدقيقة في نهار رمضان ب 5 صاغ و لم توضح إن الكلام ده إعتبارا من الدقيقة التالتة فلا بد من توجيه حملة دعائية جيدة موجهة إلى الأساتذة (انا مش مختوم على قفايا) و (انا مش راكن الفيل برة) و (حرام عليكوا نحلتوا وبري). مجلة بحلقة 4-9-2009
حرب بوجي و طمطم
فشلت محاولة إحياء شخصيتي (بوجي و طمطم) من أهم أسباب الفشل عدم وجود صوت الفنان الراحل (يونس شلبي ) و مش عارف ليه ماحاولوش يقلدوا صوته لأن صوته من أهم ملامح شخصية (بوجي) غير إن من السهل جدا تقليده ، سبب تاني للفشل و هو تعارض ميعاد عرضه مع ميعاد عرض مسلسل (حرب الجواسيس) لان الأخير فيه قدر أكبر من السطحية و السذاجة بتجذب قطاع من الأطفال تحت عمر السنة و النص. مجلة بحلقة 4-9-2009
في فيلم( خلطبيطة) للفنان( محمود عبد العزيز) كان في مشاهد يحصل فيها المواطن على جائزة( السيخ الدهب) و هو عبارة عن خابور دهب صغير و كان المواطن بيسال و هو فرحان ( و ده أعمل بيه إيه ؟) فكان الرد دايما (هاتعرف بعدين) مش عارف ايه العلاقة اللى فكرتني بالمشاهد دي و بالخابور الدهب و انا باتفرج على إعلان (حديد عز) و هو بيوزع طن حديد على كل متزوج حديثا . مجلة بحلقة 10-9-2009
عجيب هذا المنتخب كل ما نفقد الامل يرجعه تاني لينا و كل ما نستناه ياكل الفريق المنافس يتحول الى عصفور كناريا برئ مكسور الجناح بجناح سليم و يتولى الفريق المنافس مهمة تكسير جناحه و تكسير مجاديفناه معاه ,مش عارفين نتوقع اللى جاي ولا عارفين ناخد الوضع الصح ,على كل الاحوال انا عملت حسابي و صلحت (كلاكس) العربية اللى باظ مني في احتفالات كأس الامم غانا 2008 عقبال ما يبوظ تاني بس نصعد ,قولوا امين ....امين للصعود مش على الكلاكس من فضلكم. مجلة بحلقة 10-9-2009
لسة فى كلامنا عن المنتخب و المشكلة فى سوء الحظ و الاصابات المختلفة في جميع الخطوط من الدفاع الى الهجوم مرورا بخط الوسط و كل اللى بنتمناه أن الحظ السئ يبعد عن( الحضري) لانه في ظل غياب (عبد الواحد السيد) و (محمد صبحي) عدم خبرة( الهاني سليمان) قد نلجا الى (أوسة) و هو حارس جيد لا شك لكن احيانا يجبرنا على مشاهدة احدى حلقات (حارس و ست أهداف). مجلة بحلقة 10-9-2009
سكران طينة
واحد صاحبي مطرب من مطربيين الصف التاني طلب مني على الشات أكتبله أغنية مطلعها (دي عبيطة ولا بتستعبط) و الحقيقة ماقدرتش احدد اذا كان بيهزر ولا بيستعبط فاتصلت بيه فصارحني أنه سكران,فهمت الموضوع و أنهيت المكالمة بعد فترة سمعت أغنية بتقول (خليها تاكلك) ففهمت أكتر إن صديقى لسة ماوصلش لمرحلة (سكران طينة) او (بيستعبط طحن ) و إللى ممكن واحدة منهم تؤهله إلي إحتلال مكانه في مطربين الصف الأول. مجلة بحلقة 18-9-2009
نجوم جدد للمنتخب
حسن شحاتة في موقف لا يحسد عليه,فكل نجوم المنتخب لم يقدموا أداء يطمن في الاسبوع الخامس للدوري و لكن برده في مجموعة تألقت من خارج المتخب و جايز أنه يفكر يضمهم هم (بابا اركو-ابو كوني –محمد كوفي-فرانسيس-ايوا-اريك بيكو-دوتزي) هو الحقيقة كلهم مش مصريين لكن ممكن نتحجج أنهم شربوا من مية النيل بشرط اننا نثبت إنهم مش بيشربوا مياة معدنية و مصابين بعدد من الأمراض نتيجة تلوث مياه الشرب. مجلة بحلقة 18-9-2009
قهوة قطاع حكومي
في قهوة كنت شاكك انها تبع القطاع الحكومي بسبب الطلبات اللى بتتاخر و الكراسي التعبانة و الإهمال و خلافة من علامات الإدارة الحكومية, و في مرة كنت قاعد مع صديقي على القهوة دي و فجاة لقينا في الترابيزة المجاورة لينا واحد طلع سكينة و ضرب بيها اللى جنبه, بمجرد ما شوفنا الدم و بمنتهى الجبن المغلف بالحكمة و الوقار أنسحبنا من القهوة بسرعة, ولكن في المرة اللي بعدها و بدافع الفضول المغلف بعدم التكلف و جر الكلام مع (القهوجي) سألته عن السبب اللي دفع الراجل يضرب صاحبه بالسكينة فرد عليا بهدوء شديد (ولا يعرفه يا أستاذ ده طلع- مختل عقلي- ) فتأكد ظني. مجلة بحلقة 18-9-2009
فاروق حسني بالصعيدي
مؤسف جدا سقوط (فاروق حسني ) في انتخابات اليونسكو لكن المؤسف اكتر هو ان البعض فرحان جدا بالسقوط المصري لانه على خلاف مع (فاروق حسني) و ده اللى بيحصل و هايحصل كتير ....كأنها نكتة عن واحد صعيدي كان عايز يقهر صعيدي تاني فقتله أبوه,النكتة بقى ان الصعيدى التانى ده يبقى اخوه شقيقه. مجلة بحلقة 28-9-2009
-------------------------------------------------------------------------------------------------------
السر و حماتك
وقع في ايدى كتاب جميل اسمه (السر) مختصره ان افكارك هى اللى بتصنع حياتك يعنى الفكرة ليها تردد انت بتبعته و بالتردد ده بتستدعى الحدث اللى بيحصل,ببساطة توقع انك هاتبقى غني فيحصل ,توقع ان رجل حماتك تتكسر فتقع و هى طالعة السلم , الحقيقة الفكرة ازعجتني جدا لأن الشعب المصري و العربي و أغلبية العالم متوقعين تولى (جمال مبارك) الحكم بعد مبارك الأول. مجلة بحلقة 28-9-2009
-------------------------------------------------------------------------------------------------------
زمالك بلاى ستيشن
حقيقى استمتعت جدا بالزمالك في مباراة الاسماعيلي بدأت المباراة و انا مندمج في لعب (البلاي ستيشن) ولكن روعة أداء الزمالك خلتنى انسحب تدريجيا من (البلاي ستيشن) لحد ما وصلت فى خلال ربع ساعة اني بقيت قاعد في اول صف في حضن الشاشة ,نسيت اقول تفصيلة صغيرة قوى (انا كنت مغلوب فى البلاى ستيشن (7-0) ) تفتكروا مهمة التفصيلة دى ؟) مجلة بحلقة 28-9-2009
-------------------------------------------------------------------------------------------------------
عمر فؤاد
http://www.facebook.com/group.php?gid=110295024551&ref=mf
